कञ्चनपुर
बलिउडमा कैयौं अनस्क्रिन जोडी देखिए। कतिपय जोडी हलबाट फिल्म उत्रेसँगै विस्मृतिमा पुगे भने कति चाहिं दर्शकको मनमा बसिरहे। नायकको तुलनामा नायिकाको फिल्मी करिअर छोटो हुने मानिन्छ। तर, बलिउडका केही अभिनेत्री यस्ता छन्, जसले फिल्ममा पिता र पुत्र दुवैसँग रोमान्स गरेका छन्। अभिनेत्रीहरुले आफ्नो जमानाका अभिनेताहरुसँग जोडी बनाएर दर्शकको मन त जितेकै थिए, ती अभिनेताका छोरासँग पनि अनस्क्रिन जोडी सुहाउँदिलो बन्यो।
माधुरी दीक्षितले फिल्म ‘दयावान’ मा विनोद खन्नासँग जोडी बाँधेकी थिइन्। त्यसको नौ वर्षपछि उनी विनोदका छोरा अक्षय खन्नासँग फिल्म ‘मोहब्बत’ मा पनि देखिइन्। ‘दयावान’ मा काम गर्दा विनोदको उमेर ४२ वर्ष थियो भने माधुरीको २० वर्ष। उमेरमा यति अन्तर भए पनि फिल्ममा उनीहरुको जोडी गजब देखियो। नौ वर्षपछि अक्षय खन्नासँग जोडी बाँध्दा पनि कम सुहाउँदिलो थिएन।
अभिनेत्री डिम्पल कपाडियाले पनि विनोद खन्ना र उनका छोरा अक्षयसँग रोमान्स गरेकी थिइन्। उनले विनोदसँग ‘खून का कर्ज’, ‘बंटवारा’ जस्ता फिल्ममा काम गरेकी थिइन्। यस्तै, अक्षयसँग फिल्म ‘दिल चाहता हे’ मा देखिइन्।
यति मात्र होइन, डिम्पलले सन् १९८४ मा सनी देओलसँग फिल्म ‘मंजिल मंजिल’ मा काम गरेकी थिइन्। यसपछि उनले सन् १९९१ मा सनीका पिता धर्मेन्द्रसँग फिल्म ‘मस्त कलंदर’ मा रोमान्स गरेकी थिइन्।
पिता र पुत्र दुवैसँग फिल्मी जोडी बाँध्ने अभिनेत्रीको सूचीमा बलिउडकी ‘ड्रिमगर्ल’ हेमा मालिनीको नाम पनि छ। हेमाले राज कपूरसँग फिल्म ‘सपनो के सौदागर’ मा अभिनय गरेकी थिइन्। उनले राजका छोरा ऋषि कपूरसँग पनि फिल्म ‘एक चाद मैली सी’ मा काम गरिन्।
जया प्रदाले बलिउडमा कैयौं सुपरहिट फिल्म दिएकी छिन्। धर्मेन्द्रसँग ‘गंगा तेरे देश में’, ‘शहजादे’ जस्ता फिल्ममा रोमान्स गरेकी उनले धर्मेन्द्रका छोरा सनी देओलसँग पनि ‘वीरता’ मा अभिनय गरेकी थिइन्।
बलिउडकी विशिष्ट अभिनेत्री श्रीदेवीले धर्मेन्द्रसँग ‘नाकाबन्दी’ सहितका कैयौं फिल्ममा र सनी देओलसँग ‘राम अवतार’, ‘चालबाज’ मा जोडी बनेर अभिनय गरेकी थिइन्।
रानी मुखर्जीले सन् २००१ मा अभिषेक बच्चनसँग फिल्म ‘बस इतना सा ख्वाब हे’ मा काम गरिन्। यसपछि यी दुवै ‘युवा’, ‘बन्टी और बबली’ र ‘कभी अलविदा ना कहना’ मा पनि एकसाथ देखिए। रानीले अभिषेकका पिता अमिताभ बच्चनसँग पनि फिल्म ‘ब्ल्याक’ मा अभिनय गरिन्।
अभिनेत्री अमृता सिंहले सन् १९८३ मा फिल्म ‘बेताबी’ बाट आफ्नो फिल्मी करिअर शुरु गरेकी थिइन्। जसमा उनका साथी कलाकार थिए, सनी देओल। अमृताले सनीका पिता धर्मेन्द्रसँग पनि ‘सच्चाई की ताकत’ मा पनि काम गरेकी थिइन्। यो फिल्ममा उनी धर्मेन्द्रकी पत्नीको भूमिकामा थिइन्।
दक्षिण भारतीय फिल्मकी लोकप्रिय अभिनेत्री रकुल प्रीत सिंह पछिल्लो समय बलिउड फिल्ममा पनि देखिन थालेकी छिन्। उनले दक्षिण भारतीय फिल्मका अभिनेता नागार्जुन र उनका छोरा नागा चैतन्य दुवैसँग अभिनय गरेकी छिन्।
