काठमाडौं फागुन १
न्याय सेवाअन्तर्गत नवप्रवेशी शाखा अधिकृतका लागि आइतबारदेखि सेवा प्रवेश तालिम सुरु भएको छ ।
न्याय सेवा तालिम केन्द्रद्वारा आयोजित तालिमको आइतबार माननीय कानून, न्याय तथा संसदीय मामिला मन्त्री दिलेन्द्रप्रसाद बडूले उद्घाटन गरे ।
कार्यक्रममा मन्त्री बडूले न्याय सेवा अन्तर्गत न्याय, कानून र सरकारी वकिल समूहमा प्रवेश गरेका शाखा अधिकृतहरुलाई बधाई तथा शुभकामना दिँदै उच्च मनोबलका साथ सेवा प्रवेश गर्न आग्रह गरे ।
सार्वजनिक सेवामा संलग्न कर्मचारीहरुले सधैं उत्कृष्ट कार्य गरी सेवाग्राही र सरोकारवालालाई सन्तुष्टि प्रदान गर्न सक्नुपर्ने भन्दै लोकतन्त्रमा सेवाग्राही जनता सबैभन्दा ठूला हुन् भन्ने मनन गरेर छिटो र गुणस्तरीय सेवा सम्पादन गर्नुपर्ने बताए ।
‘सेवाग्राहीले तपाईहरुको अनुहारमा सरकार देख्छन् र त्यहीअनुसार सरकारप्रति धारणा बनाउँछन्’ मन्त्री बडूले भने ‘न्याय सम्पादन प्रक्रियालाई छिटो छरितो, न्यायमा सहज पहुँच, अनुसन्धान पद्धतिलाई वस्तुनिष्ठ एवं पूर्ण गराउन र न्यायका लागि आएका सेवाग्राहीलाई सन्तुष्ट गराउन लाग्नुहोस् ।’
मन्त्री बडूले ढिलो न्याय दिनु न्याय नदिनु सरह भएकोले न्याय प्रशासनलाई छिटो छरितो, सर्वसुलभ, मितव्ययी, निष्पक्ष प्रभावकारी र जनउत्तरदायी बनाउन भूमिका खेल्न कर्मचारीहरुलाई निर्देशन दिए ।
तालिम उद्घाटन कार्यक्रममा सर्बोच्च अदालतका मुख्य रजिष्ट्रार लालबहादुर कुँवर, नेपाल प्रशासनिक प्रशिक्षण प्रतिष्ठानका कार्यकारी निर्देशक डा. राजन खनाल, कार्यक्रमका अध्यक्ष एवं कानून, न्याय तथा संसदीय मामिला मन्त्रालयका सचिव उदयराज सापकोटा, न्यायसेवा तालिम केन्द्रका तालिम प्रमुख बलसागर गिरीलगायतले शुभकामना मन्तव्य राखेका थिए ।
एक महिनासम्म सञ्चालन हुने तालिममा न्याय सेवाअन्तर्गत नियुक्त भएका ११४ जनामध्ये ११३ जना सहभागी रहेको प्रेस तथा सञ्चार मामिला,मन्त्रीको निजी सचिवालयले जनाएको छ ।
