कञ्चनपुर,
कञ्चनपुरको बेलौरी नगरपालिकाका प्रमुख प्रशासकीय अधिकृत नर बहादुर विकले सरुवा गरी पालिकाकै अन्य वडामा पठाएका २ जना वडा सचिवहरू अझैसम्म पनि खटाएको ठाउँमा हाजिर भएका छैनन् ।
बेलौरी नगरपालिका कार्यालयको २०७९ पौष ७ गतेको चलानी नम्बर १२९५ र १२९७ को निर्णय अनुसार बेलौरी नगरपालिका वडा नम्बर २ का वडा सचिव श्याम कुमार रानालाई बेलौरी नगरपालिका वडा नम्बर ८ मा र वडा नम्बर ८ का वडा सचिव सन्जिव चौधरीलाई वडा नम्बर २ मा अर्को व्यवस्था नभएसम्मका लागि कामकाज गर्न खटाइएको प्रमुख प्रशासकीय अधिकृत विकद्वारा हस्ताक्षरित पत्रमा उल्लेख छ ।
वडा सचिवद्वय राना र चौधरीले खटाइएको वडामा जान अटेरी गर्दा समेत प्रमुख प्रशासकीय अधिकृत विक मौन देखिन्छन् । दुवै जना वडा सचिवहरू हाल साबिककै वडामा काम गरिरहेका छ्न् । तर उनीहरूलाई साबिककै वडामा काम गर्न नगरपालिकाले अर्को पत्र पठाएको भने देखिदैन । यस विषयमा सोधपुछ गर्दा प्रमुख प्रशासकीय अधिकृत विकले कुनै प्रतिक्रिया दिन मानेनन् ।
