कञ्चनपुर
देशका विभिन्न छुट्टाछुट्टै स्थानमा भएका सवारी दुर्घटनामा परि ३ जनाको ज्यान गएको छ ।
सवारी दुर्घटनामा परि रुपन्देहीको बुटवल उपमहानगरपालिका-२ तिनाउ पुलस्थित सडकमा बा.१९ च ९१५७ नम्बरको स्कारपियो गाडीले लु. २४ प २७५७ नम्बरको मोटरसाइकललाई शनिबार राति ठक्कर दिँदा अर्घाखाँची सन्धिखर्क नगरपालिका-१ घर भएका ३० वर्षीय मोटरसाइकल चालक वाशु आचार्यको मृत्यु भएको छ ।
दुर्घटनामा परि गम्भीर घाइते भएका उनको लुम्बिनी प्रादेशिक अस्पताल बुटवलमा उपचारको क्रममा मृत्यु भएको हो । स्कारपियो चालकलाई प्रहरीले नियन्त्रणमा लिएको छ ।
यसैगरी बाजुराको बुढिगंगा नगरपालिका-६ स्थित सडकमा सु.प.प्र.०१-००८ प ४०५० नम्बरको मोटरसाइकल आफैँ अनियन्त्रित भई शनिबार राति दुर्घटना हुँदा मोटरसाइकल चालक बाम्का बजारमा सुनचाँदी पसल गरी बस्ने अछाम साँफेबगर नगरपालिका घर भएका ३८ वर्षीय बल सुनारको मृत्यु भएको छ ।
दुर्घटनामा गम्भीर घाइते भएका उनको बयलपाटा अस्पताल अछाममा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकलमा सवार त्रिवेणी नगरपालिका-४ बस्ने ३६ वर्षीय गगन साउदको सोही अस्पतालमा उपचार भइरहेको छ ।
यस्तै मोरङको सुन्दरहरैँचा नगरपालिका-८ सलकपुरस्थित सडकमा हाल नम्बर नखुलेको सवारी साधनको ठक्करबाट साईकलयात्री नाम, थर, वतन नखुलेका करिब ३० वर्षीय पुरुषको गएराति मृत्यु भएको छ ।
ठक्करबाट गम्भीर घाइते भएका उनको धरान घोपामा उपचारको क्रममा मृत्यु भएको हो । ठक्कर दिने सवारी साधन र चालकको प्रहरीले खोजी कार्य गरिरहेको छ । दुर्घटनाका सम्बन्धमा थप अनुसन्धान गरिरहेको प्रहरीले जनाएको छ ।
