कञ्चनपुर
हेर्दा शान्त स्वभावका पुनर्वास नगरपालिकाका नव निर्वाचित नगर प्रमुख तोयप्रसाद शर्माले आफ्ना चुनावी प्रतिबद्धतालाई पालिकाबाट कार्यान्वयन गराउन सुरु गरेका छन् ।
यस अघि जेठ १० गते कार्यभार सम्हालेका पुनर्वास नगर प्रमुख शर्माले सुकुम्बासीलाई पुर्जा र शव वाहन खरिद गर्ने पहिलो निर्णय गरेका थिए ।
त्यस लगत्तै जेठ २२ गते आइतबार बसेको पुनर्वास नगरपालिकाको पहिलो कार्य पालिका बैठकबाट मेयर शर्माले मालपाेत, एकिकृत सम्पत्ती कर वडा कार्यालय बाटै बुझ्ने ब्यवस्था गर्ने र पुनर्वास सँग जाेडिएका नेपाल भारत सिमा क्षेत्रका नेपाली जमिन र बाढी प्रभावित जमिनकाे तथ्याङ्क संकलन गर्ने निर्णय गराएका छन् ।
कार्यपालिकाले आगामि आर्थिक बर्षका लागि सबै वडा कार्यालयले जेठ ३० गते सम्म वडा भेला सम्पन्न गराउन वडा कार्यालयलाई निर्देशन गर्ने निर्णय गरेकाे छ ।
चुनावी प्रतिस्पर्धामा रहदा प्राविधिक शिक्षामा जोड दिने प्रतिबद्धता गरेका शर्माले पुनर्वास न.पा. ५ मा रहेकाे गाैरी शँकर माध्यमिक विद्यालयलाई शैक्षिक सत्र यसै वर्ष देखी कक्षा ९ मा वाली बिज्ञान (कृषी) बिषयकाे प्राबिधिक तर्फकाे अध्यापन गराउन अनुमति दिने निर्णय भएकाे नगर प्रमुख ताेय प्रसाद शर्माले बताएका छन् ।
पुनर्वासमा देखिने गरि काम गर्ने प्रतिबद्धता सहित आफू सबै जातजाति , धर्म , समुदाय र वर्गका नागरिकहरु संग समन्वय गरि नगरको बिकासमा रत्तिभर बिचलित नभई लागि पर्ने नगर प्रमुख शर्माले बताए ।
