दीपेन्द्र बस्नेत
धनगढी,
दुर्लभ वन्यजन्तुको चोरी सिकारी र तस्करीको गिरोहमा संलग्न एक ब्यक्तिलाई रेड पान्डाको छाला सहित कैलालीको गोदावरी स्थित एक सामुदायिक वनबाट आज प्रहरीले पक्राउ गरेको छ ।
पक्राउ पर्नेमा बझाङको बित्थड चिर गाउँपालिका ५ देउलेखका २३ वर्षिय अमर धामी रहेका छन् । उनी बाट प्रहरीको टोलीले एकथान रेड पान्डाको छाला बरामद गरेको हो ।
उनलाई आज बिहान सवा १० बजे कैलालीको गोदावरी नगरपालिका ५ स्थित गेटा सामुदायिक वन बाट रेड पान्डाको छाला सहित नियन्त्रणमा लिइएको संघिय प्रहरी इकाई कार्यालय धनगढी हाल महेन्द्रनगरका डिएसपी लक्ष्मण शाहीले बताए ।
कैलालीको अत्तरीया र आसपासको क्षेत्रबाट दुर्लभ हिमाली वन्यजन्तुको चोरी सिकारी र छाला लगायतका अन्य अंगहरुको तस्करी गर्ने गिरोह सक्रिय बनेको गोप्य सुचनाका आधारमा परिचालित संघिय प्रहरी ईकाइ कार्यालय धनगढी हाल महेन्द्रनगरको प्रहरी टोलीले उनलाई छाला सहित नियन्त्रणमा लिइएको डिएसपी शाहीले बताए ।
रेड पान्डाको छाला सहित नियन्त्रणमा लिइएका धामीको थप अनुसन्धान सुरु गरिएको डिएसपी शाहीले बताए ।
