कञ्चनपुर, ३० । कञ्चनपुर निर्वाचन क्षेत्र १ मा नेकपा एमाले भित्र असन्तुष्टि चरम उत्कर्षमा पुगिरहेको छ ।
मङ्सिर ४ मा हुने प्रदेश तथा प्रतिनिधि सभा सदस्य निर्वाचनमा टिकट वितरणको विषयलाई लिएर नेकपा एमाले भित्र असन्तुष्टि चुलिएको छ ।
पार्टी सङ्कटमा परेका बेला पाटी छाडेर जाने पदकै लागि आउने जानेलाई टिकट दिएर कम्युनिस्ट आन्दोलन भष्मासुरमा थन्क्याउन खोजेको भन्दै पुनर्वासका चार प्रभावशाली नेताहरूले पार्टी परित्यागको घोषणा गर्दै राजीनामा दिएका छन् ।
सामूहिक राजीनामा पत्र लेख्दै एमाले पुनर्वासका प्रभावशाली नेता तथा एमाले केन्द्रीय सल्लाहकार परिषद् सदस्य रामचन्द्र नेपाल, प्रदेश कमिटी सदस्य पदम प्रसाद शर्मा, जिल्ला कमिटी पूर्व सल्लाहकार, श्यामलाल सुवेदी र जिल्ला कमिटी सल्लाहकार पूर्व सदस्य शङ्कर बहादुर केसीले संयुक्त राजीनामा दिएका हुन । उनीहरू चारै जनाले जिल्लादेखि केन्द्रलाई बोधार्थ दिँदै राजीनामा दिएका छन् ।
कञ्चनपुर १ मा एमाले परित्यागको घोषणा गर्दै तीन जना बागी उम्मेदवार रहेका छन् ।
प्रतिनिधि सभा सदस्य पदमा खेम सुवेदी, प्रदेश तर्फ टेक साउद र भक्त बहादुर अधिकारीले बागी उम्मेदवारी दिएका छन् । बागी उम्मेदवारी दिएका एमाले पुनर्वासका नेता स्थिर प्रसाद घिमिरेले भने फिर्ता लिएका छन् ।
- विज्ञापन -
